34 Alderantzizko fandangoa

                                                     Alderantzizko fandangoa

Alderantziz baledi mundua egun hasirik ,
oraiaren zilbor hestea tinko eskuraturik,
leize sortzerainoko sokaz trezatu bidetik,
mendez mende atzerantz, gizakiari so eginik,
gizaz giza, adinez adin atzeraka abiaturik, aurreko bidea harturik

Betetzetik hutsera gure bizia abiatuko balitz, jot a ke
eta nondik gatozen ezin onartuz, inork sinetsiko luke,
Bixtan den balizko lokarri luzea egia bihur litzaiguke,
Gazteek sinesgaitzaren frogak eskatuko lizkigukete.

Pentsa gizakia gaztetzen doakela, gaztearen indarra lortu arte.
Pentsa, gaztearen ausardiaz umearen inozentzian sartzea , bake!
Sortzearen atean joko luke ta ama ageriko litzaioke,
sabela beterik, erditzeko gertu, munduaren lehena geroaz bete
.

Eta mundua gibelera, kondaira barnean aurrera ibiltzen,
dardarez aintzina iturrizko leize
beltzeraino ailatzen,
harpeetan musuka ta elegabeko umeak erditzen
atzeraka etzanik, tente egoteko ohituretatik urruntzen.

Karboi hamalaurik gabeko ikerketan, lotsa, ahalkea, eleka,
merexitako zigorra datorkigu, mendekuz beteta,
zigortzat lezea, makiltzat harpea, zut egoteari ezetza,
mintzoari uko, mutu bihurtzea, giza betiko erreta,
ahanzpenaren eskutik alderantzizko munduaren ikaraz eta,
hortarako ez baiginen sortu, onar, otoi, dolu aitorketa.

Alderantziz baledi mundua egun hasirik ,
oraiaren zilbor hestea tinko eskuraturik,
leize sortzerainoko sokaz trezatu bidetik,
mendez mende atzerantz, gizakiari so eginik,
gizaz giza, adinez adin atzeraka abiaturik, aurreko bidea harturik